மெல்பன் மாநகரில் ஈழத் தமிழர்கள் ஊர்வலம்

தமிழீழப் பிரதேசத்தில், சிறீலங்கப் படைகளின் அட்டூளியங்களாலும் அவர்களின் வான் மற்றும் எறிகணைத் தாக்குதல்களாலும், தமிழ் மக்களின் நிலை மிகவும் மோசமாகிக்கொண்டு செல்லும் இவ்வேளையில், மெல்பனில் தமிழ் இளையோர் அமைப்பினர் ஈழத்தில் மக்கள் படும் அல்லலினை உலகுக்கு எடுத்துக் கூறும்முகமாக ஒரு எழுச்சி ஊர்வலம் ஒன்றை இன்று நடாத்தினர்.

இந்த ஊர்வலத்தில் 700 வரையிலான தமிழ் மக்கள் கலந்துகொண்டனர். தமிழ் மக்களின் மன வெளிப்பாடுகளையும் விடுதலை உணர்வையும், சிறீலங்காப் படைகளின் பயங்கரவாதச் செயலையும் வெளிப்படுத்தும் வகையில் பல்வேறு வாசகங்கள் அடங்கிய பதாகைகளைத் தாங்கியவண்ணம் அவுஸ்திரேலிய மெல்பன் மாநகரப் பகுதியில் மக்கள் ஊர்வலமாக நடந்தனர். இந்த ஊர்வலம் மெல்பன் நகரிலுள்ள பெடரேஸன் சதுக்கத்தில் ஆரம்பமாகி, மெல்பன் பாராளுமன்றம்வரை சென்று, பின்னர் அங்கிருந்து மீண்டும் பெடரேஸன் சதுக்கத்தில் வந்து முடிவுபெற்றது. இந்த ஊர்வலத்தின் மொத்த நடைபாதைத் தூரம் அண்ணளவாக நான்கு கிலோ மீற்றர்கள் ஆகும்.